Biogipuzkoa Osasun Ikerketa Institutuko, Osasun Saileko eta Osakidetzako diziplina anitzeko talde batek, EHUrekin lankidetzan, kimioterapiako formula berri bat garatu eta patentatu du, zeinak eraginkortasun nabarmena erakutsi duen kolangiokartzinoma –gibeleko minbizi oldarkor eta oso pronostiko txarreko bat–, tratatzeko.
Ikerlana Journal of Hepatology aldizkari ospetsuan argitaratu berri da, eta aukera terapeutiko berriak irekitzen ditu, kolangiokartzinomaren tratamendurako ez ezik, ohiko tratamendu onkologikoekiko erresistenteak diren beste tumore solido batzuetarako ere.
Minbiziaren aurkako alternatiba berri bat
Kolangiokartzinomak behazun-hodietan garatzen diren tumore multzo heterogeneo bat osatzen du. Ezohiko gaixotasuntzat jotzen bada ere, azken hamarkadetan gora egin du haren intzidentziak maila globalean. Gibeleko bigarren minbizi mota ohikoena da, eta, etapa aurreratuetan diagnostikatu ohi denez, aukera terapeutikoak mugatuak dira eta gehienak aringarriak, tumore horien erresistentzia handia dela eta, neurri handi batean.
Testuinguru honetan, formula kimioterapeutiko berri hau etorkizun handiko alternatiba bat da. Konposatu honek, giza tumore-zelulen biziraupena murrizteko eta animalietan tumore-hazkundea geldiarazteko gaitasun nabarmena erakutsi du, baita gaixotasunak ohiko tratamenduei erantzuten ez dien kasuetan ere.
Gainera, orain arte egindako azterlan aurreklinikoek segurtasun-profila agertu dute, dosi terapeutikoetan ez baita ikusi efektu toxikorik dagoenik. "Gure konposatuak minbiziaren aurkako borrokan potentzial handia duen bide terapeutiko berri bat dira. Gaur egungo tratamenduekiko erresistentzia gainditzeko duen gaitasuna bereziki garrantzitsua izan liteke alternatiba eraginkorrik ez duten pazienteentzat", nabarmendu dute Jesús Bañales Biogipuzkoako Gibeleko Gaixotasunen Taldeko arduradunak eta Fernando Cossío azterlanaren koordinatzaileak.
Aurkikuntza horrek agerian uzten du etorkizuneko garapen klinikoko faseetarako etorkizun handiko terapia gisa duen potentzialtasuna, eta etorkizun hurbilean pazienteen saiakuntza klinikoetan ebaluatu ahal izateko itxaropena dago.
Ikerketa hau Irene Olaizola ikertzaile biomedikoko doktoreak eta Biogipuzkoako Bihotzeko Gaixotasunen Taldeko arduradun eta Ikerbasqueko ikertzaile den Jesús Bañalesek zuzendu dute; baita EHUko Kimika Organikoko katedradun eta Ikerbasqueko zuzendari zientifiko den Fernando Cossíok ere. Ikerketa hau Eusko Jaurlaritzako Osasun Sailak, Ikerbasque Fundazioak, Carlos III Osasun Institutuak eta CIBERehdek finantzatu dute. Bertan, estatuko eta nazioarteko zentroetako ikertzaileek parte hartu dute, besteak beste, Donostia International Physics Centerrek (DIPC) eta Glasgowko Unibertsitateak (Erresuma Batua), bai eta Salamancako Unibertsitateak ere, CIBERehd barneko partzuergoaren barruan.
.png)
