Minbizia aztertzean, arreta geneetan eta zelulen jarduera erregulatzen duten molekuletan jarri ohi da. Hala ere, Biofisika Institutuko talde bat hain ezaguna ez den, baina gero eta garrantzi handiagoa duen beste faktore bat ikertzen ari da: zelulek beren ingurunearen propietate fisikoak hautemateko duten gaitasuna.
Bularreko Minbiziaren Nazioarteko Eguna dela eta, ikertzaileek funtsezko galdera bati erantzun nahi dion ikerketa-ildo bati ikusgarritasuna eman nahi diote: zer gertatzen da zelulek inguruko ehuna zurrunago bihurtzen dela hautematen dutenean? Erantzuna garrantzitsua izan liteke bularreko minbizia bezalako gaixotasunak hobeto ulertzeko. Hainbat ikerketek erakutsi dute tumoreetako ehunak ehun osasuntsuak baino zurrunagoak izaten direla eta aldaketa fisiko horiek zelulen portaera alda dezaketela. Zelulek seinale horiei erantzuten diete gaixotasunaren forma oldarkorragoekin lotutako ezaugarriak hartuz.
Fenomeno hori mekanobiologiaren ikergaietako bat da. Diziplina horrek indarrek eta propietate mekanikoek sistema bizidunetan duten eragina aztertzen du. Biofisika Institutuan, ikertzaileek mekanobiologia eta ikerketa biomedikoko arlo tradizionalagoak uztartzen dihardute.
«Hamarkada askotan, indar mekanikoak ez dira kontuan hartu biologia eta patologiak ulertzeko garaian», azaldu du Ion Andreuk, Biofisika Institutuko Ikerbasque ikertzaileak. «Hala ere, gaur egun ikusten ari gara funtsezkoak direla enbrioi-garapenetik zahartzeraino, baita bularreko minbizia bezalako patologietan ere».
Ikerketa diziplina anitzeko talde batek garatzen du; talde horretan daude, besteak beste, Maddi García Ayerbe doktoregaia eta Cristina de la Parte ikerketa-teknikaria. Haien helburua da zelulek inguruko informazio fisikoa eta kimikoa nola integratzen duten ulertzea, hazteko, mugitzeko edo ehunetan gertatzen diren aldaketei erantzuteko moduari buruzko erabakiak hartzeko.
Ikerketa-taldeak azpimarratzen du bere lanaren helburua ez dela berehalako tratamendu bat garatzea. Oinarrizko ikerketa da, oraindik guztiz ulertzen ez diren prozesu biologiko konplexuei buruzko ezagutza sortzera bideratua. Ezagutza hori da, ikertzaileen arabera, etorkizuneko aplikazio biomedikoen oinarriak ezar ditzakeena.
Mekanobiologia bezalako diziplina berriak biokimika bezalako eremu finkatuagoekin uztartzen diren heinean, zientzialariek bularreko minbizia bezalako gaixotasun konplexuen ikuspegi osoagoa lortzea espero dute.
.png)
